يعني إيه العادة؟
كلاكيت ١٠ مرة: هابدأ دايت من بكره
كام مرة قولت الجملة دي؟
في الغالب مش بس الدايت اللي بنقرر نعمله وبنقول ومش بنبدأ، أو الحق يتقال بنبدأ بس بنزهق في النص، أو زي ما تقولوا بنعطل كده.
تفتكروا ليه ممكن يكون بيحصل كده؟؟ .. قبل ما نتكلم عن يعني إيه العادة؟
تعالوا نسأل السؤال بالعكس: إيه اللي يخليني أبدأ وأكمل أي حاجة بدون ما أزهق؟؟
أو تبقي عادة عندي أعملها علطول؟
بالظبط احنا قولنا الإجابة اهو اللي يخليني أبدأ وأكمل في أي حاجة هو “العادة” أو إني أحولها لعادة.
يعني إيه العادة؟
ببساطة العادة هي سلوك معين أو تصرف معين بعمله بانتظام أو بطريقة روتينية وأتوماتيكية.
زي إني أصحي من النوم الفجر أفتح التلاجة وآكل!!
أو إني آكل لب أو فشار وأنا بتفرج علي فيلم السهرة.
أو اصحي من النوم أشوف الرسائل اللي وصلتني علي كل الابلكيشنز.
طيب العادة دي بتتكون من إيه؟
بيقولوا أن عملية العادة دي بتتقسم إلى ٤ مراحل سهلة وهما.
١. الإشارة: وهي زي الضوء كدة اللي بينور، بيخليني اتنقل للمرحلة اللي بعدها.
٢. التوق: بعد ما ينور الضوء ده، أقرر إني أتجه ناحيته أو ناحيه الشعور أو التصرف.
٣. الاستجابة: هو إني فعلًا أتحرك مش مجرد قرار أخدته.
٤. المكافأة: ودي بقي اللي باخدها لما أوصل للضوء اللي نور ده، زي إني أشبع جوع معين أو أحقق إنجاز معين.
زي كدة مثلًا لما تشم رائحة مانجة في الثلاجة (الإشارة).
بعدها تقرر إنك تأكلها (التوق).
بعدها تجيب سكينة ومعلقة أو حتى طبق بس وتفتح الثلاجة تاخد المانجاية (الاستجابة).
وبعد ما تأكلها وتسرح شعر نواه المانجاية بعد ما تخلصها وأنت مستمتع تلاقي (المكافأة).
طيب هستفاد إيه لما أعرف الكلام ده؟
جون ماكبث جالبريث قال:
العادات والتقاليد تخدمنا في حمايتنا من عناء التفكير.
ودة بالظبط اللي هيفيدنا لما نعرف الكلام ده هو أننا نفكر لأن بصراحة كلام الأستاذ “جون” يبان حلو ومريح، مش قال “تخدمنا في حمايتنا”
يبقي الحمد لله مفيش عناء ولا تعب ولا حتى هانفكر.
وهنا تكمن المشكلة، أن ٥٠ ٪ من الحاجات اللي بنعملها يوميًا أو حتى أسبوعيًا أو في الحياة عامةً بتبقي عادات بنعملها زي ما قولنا في التعريف فوق خالص
بتعملها بطريقة روتينية بدون تفكير وده طبعا بيبقي وراه إيه؟؟
برافو عليك عادات كتييير سلبية، أو حتى عادات بتعطلني، أو أقولك المفاجأة عادات بتأخرني إني أكون الشخص اللي عايز أكونه قدام شويتين.
طيب أنا قريت الكلام كله وعرفت المشكلة فين وعرفت يعني إيه عادة.
أعمل إيه؟؟
أو ازاي اكوّن عادة جديدة إيجابية تطلعني خطوات قدام وماتكونش بتحميني حماية زائفة من عناء التفكير على رأي: “جون ماكبث جالبريث“
هقولك المقال الجاي !
اترك تعليقاً