ما تيجوا نزعل شوية..

هنتكلم النهاردة عن التعامل مع الحزن و قبل ما نقول هانتعامل مع الحزن ازاي ما تيجوا نحس بيه. من واحنا صغيرين اول ما بنتعور بيقعدوا يقولولنا خلاص اهو ضربنا الأرض الي عورتك و بقيت حلو ونجيب اللعبة وخلاص محصلش حاجة و نرجع نضحكلهم تاني . كبرنا كد ناسيين نحس بالحزن و ناكرين و شايفين انه بلاش نكد بقى ما الحياة حلو خلينا فارحنين .

و للأسف اتكون عندنا افكار في اللاشعور عن انكار مشاعر الحزن دي واني كدة حد لذيذ و رايق …. أصدمك! ده مش حقيقي احنا عرفنا ان كبتنا لمشاعرنا قبل كدة ناتيجه ايه (اقرا عن كبت المشاعر بيعمل فيك ايه؟) فما بالنا بكبت شعور مهم لينا جداً كابشر زي الحزن ارجوك اسمح لنفسك انك تحزن عادي.

طيب جميل سمحت لنفسي احزن هااا و بعدين؟

كيفية التعامل مع الحزن

الأعتراف بمشاعر الحزن واحترامها

نقول لنفسنا اننا زعلانين دلوقتي و اني محتاج اخد وقت احس بحزني . أحترم اني مريت بفقد او جرح او مواقف صعبة علىّ . حتى لو الي حواليا قللوا من ده و حالوا يخرجوني منه. انت من حقك تحزن و تقدر نفسك الي خسرت دي. مش هنكون اقوى ناس لو دوسنا على وجعنا و كأنه محصلش حاجة.

قضاء وقت مع النفس

محتاج تقعد معاها و تشوف مالها. اي حد من اصحابنا الي حوالينا بيجي منهار و زعلان مش بنقعد نسأله ايه الي حصل و نحلل و نقيم مع ان ده هايتعمل بس مش دلوقتي بنهديه بنجبله ليمون و نقوله هااا ايه الي حصل بقى احكيلي .. ده هيساعدنا في التعامل مع الحزن.

احنا هنعمل كدة هنقعد مع نفسنا و بهدوء نشوف ايه الي حصل. لو نقدر نكتب سرد بسيط للأحداث كأنها قصة و نقول كل الي جوانا من مشاعر و افكار و لخبطة . ده هايكون مفيد لتكوين صورة عن الحدث غير المحفوظة في ذهننا.

ولو حابب تتكلم اعمل كدة او تتكلم مع حد يكون مستمع جيد ياريت. عاوز تكتب برضه اعمل كدة المهم انك تهدى بالطريقة الي تناسبك عشان نعرف نعمل الخطوة الي بعدها بشكل كويس لانها مهمة جداً.

الوصول إلى مرحلة التقييم

هنا بقى بنكون هدينا و وصلنا لدرجة من احساسنا بالسلام عشان نقدر نقيم بشكل مفيد بنشوف بنضارة حيادية بلاش السودة عشان مش هنشوف بيها و بلاش البينك عشان مش حقيقية خلينا في الشفافة و تكون متنضفة كدة .

يعني لا نهول من الي حصل و نديه اكبر من حجمه و ان العالم خلاص بينتهي و ان هافضل حزين الباقي من عمري و كتاب حياتي يا عين .بأختصار لانه مش حقيقي .

ولا نهون و انه و ايه يعني الي حصل ده او عادي الحياة جميلة جداً. و يلا نتفائل واللي جاي احلى بلاش نقفز بنظرتنا و مشاعرنا من الابيض للأسود.

الوجود وسط الناس

ايوا ايوا الناس انا عارفة ان الانسان اول ما بيتضايق بيبقى عايز يقعد لوحده و ميشوفش حد بس حاول تكون وسط ناس. مش مهم انك تحكيلهم وجعك بس انك تكون وسط ناس او بتمارس اي نشاطات معاهم . لما بنكون لوحدنا طول الوقت و احنا زعلانين بنبقى احنا والحزن لوحدنا ده هايوصلنا للاكتئاب حاول توازن بين قعدتك مع نفسك و الناس.

الوصول إلى مرحلة التعافي

التعافي هي كلمة مايكيفهاش سطور لكن هى مرحلة بنحتاج نرتاح ونرسى بكل ما فينا فيها حتمياً هنوصلها. في المرحلة دي هنكون مرينا بكل الي فات و زي ما بيقولوا هننضف جرحنا و نطهره كويس و نحط البلاستر. مش هننسى مكانه و لا علامته هتروح هتفضل موجودة لكن هتكون وقتها مُتسامح مع التجربة. فاهم بأنك مريت بحزن و هديت و قبلت الي فات بكل ما فيه. عندك درجة من الرضى للحدث بقيت خفيف و حُر مش لسة مربوط في الي فات و في وجعك؛ هتفتكر و تدمع بس و انت مُتسامح مع التجربة.