ابدأ عادة جديدة

ازاي اكوّن او ابدأ عادة جديدة ؟

برديس سميرات قالت

في قوانين واضحة قوي عشان ابدا عادة

١- اجعل العادة واضحة

دة يحصل لما  تعمل الخطوات اللي جاية دي :

أ-  انك تسجل العادات بتاعتك :

يعني ببساطة تجيب ورقة وتقسمها جزئين اول جزء تكتب فيه العادة اللي بتعملها يوميا والجزء التاني تكتب إذا كانت سلبية أو إيجابية أو عادة محايدة مش بتفيد ولا حتي بتضر

 يعني مثلا عادة اني اصحي الصبح اشرب مياه جنبها هتكتب ايه ؟ برافو إيجابية

أو عادة اني اكل بالليل متأخر اكل تقيل ؟

لا دي معروفة عادي أنها سلبية بس مع اخواتنا اللي مش بيتخنوا دي بالنسبة لهم حلوة عشان تكسب وزن وأسأل مجرب  .

 

ب: يكون عندك نية التنفيذ

طيب دة معناه اني لما بقول حاجة اللي بيبوظها اني مش عندي النية داخليا ؟؟

لا طبعا مش معناه كدة .

بس نية التنفيذ دة مرتبطة بالقانون رقم ٣ في المقال الاول ( الاستجابة ) مش بس إشارة وتوق

لكن احدد وقت محدد وطريقة معينة واضحة وصريحة ومناسبة ليا في التنفيذ .

 

ج : ترتيب العادة الجديدة بعد عادة قديمة أنا اصلا بعملها .
عادة جديدة مكان عادة قديمة سيئة

ودي شوية مرتبطة بنية التنفيذ اللي قولناها فوق وبتكملها  .

يعني لو انتي بالليل بتجهزي اكل الاولاد بتاع المدرسة أو الحضانة ف ممكن تجهزي لنفسك اكل صحي للشغل بدل ما تأكلي اكل مُضِر

او لو مثلا عندك عادة انك تفتح الموبايل اول حاجة لما تصحي حط جنبها العادة الجديدة

هي انك تكتب to do list اليوم تساعدك تنجز المهام اللي عندك بسرعة

د :حاول تعيد تصميم البيئة عشان تساعدك تعمل العادة.

 يعني مثلا لو عندك دواء معين مهم تاخده قبل النوم حاول تحطه في اخر مكان بتروح عنده بالليل .

او لو قررت تشرب مياه كتيرة ف ممكن تشتري زجاجة مياه شكلها مشجع ليك واملأها عشان تقعد وقت أطول وتشرب اكتر مثلا .

 

طيب اعمل ايه لو حواليا ناس بتعطلني أو حاجات بتعطلني ؟

دة هينقلنا لتاني قانون ، هو اني اخليها  بتاعتي جذابة اعمل كدة ازاي بقي ؟؟

١- اني اربط العادة الجديدة بعادة قديمة ممتعة ليا

زي اني اعمل مشي في المكان أو اتمشي علي المشاية و أنا بتفرج علي مسلسل بحبه .

٢- حاول تنضم لمجموعة

مجموعة تكون بتعمل نفس الحاجة اللي انت عايز تتعود عليها ،مش بتعطلك

يعني لو قررت تتمارس المشي دوّر على ناس المشي معاها ممتع وبتنبسط من الحكاوي معاه دة بيفرق أسأل مجرب .

 

طيب أنا عملت كل دة وبرضه بوقف في النص  

 

السبب في الموضوع دة اخر ٢ من قوانين تشكيل العادات .

وهما

٣- اجعلها سهلة .

٤- اجعلها مشبعة .

قانون رقم ٣ بيقولك علي مهلك مش اول ما أقرر الحماسة تاخدني وأحط لنفسي تحدي كبير يعجزني .

يعني لو قررت أشرب مياه وانا اصلا مش بشرب خالص أقول أنا هشرب ٣ لتر ازاي طيب ! أنا كدة بعجّز نفسي .

طيب اعمل ايه ؟ ببساطة اقول أنا هشرب بكرة ٤ كوبايات واحاول استمر علي كدة علي الاقل اسبوعين علي ما اقرر اكبّر التحدي .

ودة هينقلنا للقانون الاخير اني اجعلها مشبعة .

دة يحصل ازاي ؟!

أ – اني أشارك مع حد مهم عندي أو لصديقي المقرب واقول قدامه اني مثلا هكافئ نفسي لو إلتزمت اسبوعين اني اشتري زجاجة مياه شكلها حلو وجذاب مثلا .

ب: هو اني اعمل جدول اسمه جدول تتبع العادات

اكتب فيه وكل يوم ألتزم احط علامة في خانة اليوم بتاعها وبعد ٣٠ يوم تكافئ نفسك بحاجتين ،

اولا بالالتزام ، والحاجة التانية إن بنسبة مش قليلة الف مبروك بقي عندك عادة إيجابية جديدة هتستمر معاك وتبقي بتعملها بشكل روتيني وكمان مفيدة وحتي لو لسة ف مش هيبقي فاضل كتير ..انت قربت.. وانت وشطارتك بقي .

 

الوسوم:

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ

إشترك معنا