يعني ايه العادة

كلاكيت ١٠ مرة : هبدأ دايت من بكرة

كام مرة قولت الجملة دي ؟

في الغالب مش بس الدايت اللي بنقرر نعمله وبنقول ومش بنبدأ أو الحق يتقال بنبدأ بس بنزهق في النص ، أو زي ماتقولوا بنعطل كدة .

تفتكروا ليه ممكن يكون بيحصل كدة ؟؟

طيب نسأل السؤال بالعكس ايه اللي يخليني ابدأ وأكمل اي حاجة بدون ما ازهق ؟؟

أو تبقي عادة عندي اعملها علطول  ؟

بالظبط احنا قولنا الإجابة اهو اللي يخليني ابدأ وأكمل في أي حاجة هو “العادة “أو اني احولها لعادة .

يعني ايه العادة ؟

ببساطة العادة هي  سلوك معين أو تصرف معين بعمله بانتظام أو بطريقة روتينية واتوماتيكية .

زي اني اصحي من النوم  الفجر افتح التلاجة واكل !!

زي اني اكل لب أو فشار وانا بتفرج علي فيلم السهرة .

أو زي اني اصحي من النوم اشوف الرسائل اللي وصلتني علي كل الابلكيشنز .

طيب العادة دي بتتكون من ايه ؟

بيقولوا أن عملية العادة دي بتتقسم الي ٤ مراحل سهلة  وهما .

١- الإشارة : وهي زي الضوء كدة اللي بينور بيخليني اتنقل للمرحلة اللي بعدها .

٢- التوق : بعد ما ينور الضوء دة اقرر اني اتجه ناحيته أو ناحيه الشعور أو التصرف .

٣- الاستجابة : هو اني فعلا اتحرك مش مجرد قرار قررته .

٤: المكافأة : ودي بقي اللي باخدها لما اوصل للضوء اللي نور دة زي اني اشبع جوع معين

أو احقق إنجاز معين .

زي كدة مثلا لما تشم رائحة مانجة في الثلاجة  (الإشارة ).

بعدها تقرر انك تأكلها ( التوق ).

بعدها تجيب سكينة ومعلقة أو حتي طبق بس وتفتح الثلاجة  تاخد المانجاية ( الاستجابة ).

وبعد ما تأكلها وتسرح شعر نواه المانجاية بعد ما تخلصها وانت مستمتع تلاقي ( المكافأة ) .

طيب هستفاد ايه لما اعرف الكلام دة ؟

جون ماكبث جالبريث قال :

العادات والتقاليد تخدمنا في حمايتنا من عناء التفكير.

ودة بالظبط اللي هيفيدنا لما نعرف الكلام دة هو أننا نفكر لأن بصراحة كلام الاستاذ “جون ” يبان حلو ومريح مش قال “تخدمنا في حمايتنا “

يبقي الحمدلله مفيش عناء ولا تعب ولا حتي هنفكر .

وهنا تكمن المشكلة أن ٥٠ ٪ من الحاجات اللي بنعملها يوميا او حتي أسبوعيا أو في الحياة عامة بتبقي عادات بنعملها زي ما قولنا في التعريف فوق خالص

بتعملها بطريقة روتينية بدون تفكير ودة طبعا بيبقي وراه ايه ؟؟

برافو عليك عادات كتييير سلبية ،أو حتي عادات بتعطلني ، أو اقولك المفاجأة عادات بتاخرني اني اكون الشخص اللي عايز اكونه قدام شويتين .

طيب أنا قريت الكلام كله وعرفت المشكلة فين وعرفت يعني ايه عادة .

اعمل ايه ؟؟

أو ازاي اكوّن عادة جديدة إيجابية تطلعني خطوات قدام وماتكونش بتحميني حماية زائفة من عناء التفكير علي رأي “ جون ماكبث جالبريث

هقولك المقال الجاي !

 

الوسوم:

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ

إشترك معنا