شايف نفسك فين كمان ٥ سنين ؟!

يا ترى تعرف ايه عن التغيير وإيه رأيك فى معنى التغيير ؟؟ اكتبلنا رأيك الاول في كومنت وتعالى نشوف حكاية السؤال ده اللي بيتسألنا كتير !

شايف نفسك فين كمان ٥ سنين ؟!

ليه بيسألوا السؤال ده في اي شغل ؟

الصراحة السؤال ده قعد وقت طويل بالنسبالي سر غريب وكان جوايا نفسي اقول وانتوا مالكوا  يعني  بس قولت لا بنتي عيب مايصحش الناس اكيد همها علي مصلحتك يعني

والحقيقة اكتشفت أن السر وراء السؤال دة مش إجابة حضرتك خالص ،

بس السر وراه عقلية حضرتك

يعني ببساطة اياً كانت اجابتك ايه بيبقي السر وراها أنه عايز يعرف عقلية حضرتك ايه هل هي عقلية نمو وتطور ومش عطلانة  ولا عقلية يا مولانا تولانا ويكفي اليوم شره .

والحقيقة احنا في المقال دة مالناش دعوة بالعقلية التانية عشان هي مفيهاش اي مجهود الحقيقة غير انك تجيب فشار وتاكل وشكرا علي كدة .

ازاي اقدر اجاوب علي سؤال هكون فين كمان ٥ سنين ؟

ببساطة لو سألت حد رايح مشوار معين هتوصل امتي ؟

هيرد يقولك ببساطة هوصل من فين ؟ وهوصل لفين ؟ عشان يقدر يحدد المسافة

هنا احنا الحمدلله عندنا المدة ، فاضل ايه ؟؟

صح جدا  فاضل أنا اصلا فين ورايح فين

وإجابة السؤالين دول هو بالظبط صميم عقلية التطور والتغيير .

اول سؤال : أنا اصلا فين ؟  دة برد عليه لما اركز علي نفسي دلوقتي  اشوف ردود فعلي ،وردود الفعل دي هترد علي معتقداتي وافكاري والحاجات اللي بصدق فيها وبتحركني.

والإجابة دي هتساعدني الحق بسرعة اكتشف فين المشكلة .

وابدا اشتغل علي نفسي وعلي المشكلة لغاية لما اوصل فعلا لإجابة السؤال التاني أنا عايز اتغير ابقي ازاي ؟ أو اوصل لفين ؟

هل دة معناه اني شخص مش كويس ومحتاج اتغير ؟

 بالعكس خالص التغيير مش معناه أن في مشكلة أو أن حضرتك شخص مش كويس ولازم تلحق بسرعة لحسن الوضع صعب .

لأ مش كدة خالص اطمن .

دة فكرة أن حضرتك شخص بيتطور وبيكبر وبيتغير دة لوحده دليل انك زي الفل .

بيقولوا :اسرع طريق للوصول هو تحديد الهدف المراد الوصول إليه

في التغيير بحتاج احط الجملة دي قدام عيني دائما عشان تطمني لحاجتين ،

أولاً: أن التغير ممكن مش مستحيل .

ثانيا ً: اني محتاجة احدد أنا عايز اشتغل علي ايه او اتغير في ايه .

وده كمان يساعدني اني ابقي مهدّف وانا بدور علي اللي يساعدني في التغير ،

على سبيل المثال تدريب أو مثلا ً كتاب وممكن كمان اني اقعد مع حد أقوله اني اكتشفت اني عايز اشتغل علي الجزء ده في حياتي ممكن تساعدني ؟

بس السر اني اكتشف اصلا !!

أخيراً  بعد كل الكلام ده

يعني ايه تغيير  (إيه معنى التغيير) ؟؟

اول واهم نقطة في معنى التغيير اني احب نفسي قوي قوي قوي عشان اتغير بدافع حبي ليها مش بدافع اني زهقان من نفسي !

وبعدين :

١- اني اركز مع نفسي وعلي نفسي واراقبها.

٢- اني اهتم اتعلم عن نفسي زي ما بقرأ كتالوج اي جهاز غالي بشتريه .

٣- اني احاول أطبّق اللي قريته في الكتالوج علي المشكلة اللي بلاقيها في سكتي وانا بعمل النقطة رقم ١ فوق .

٤ – اني اطمن اني اقدر فعلا اكتشف من أي تصرف بعمله أنا بعمل كدة ليه ؟وازاي ؟وعشان ايه؟ واقدر كمان اظبط واعدّل اللي محتاج تعديل

٥- اني اكرر النقاط اللي فوق دي 👆 كل شوية ودايما .

٦- اني استمتع بأي إنجاز احققه في رحلة التغير عشان مع نهاية كل رحلة هتلاقي طريق لرحلات امتع فيها بتحب نفسك اكتر واكتر

والخلاصة :  أن التغيير عامل زي الفرق بين الدايت والريجيم

أما الدايت بعمله عشان اخس شوية وزن زيادة حبة أو حبتين وابقي رشيق

الرچيم دة أسلوب حياة صحية يقرر أعيشه عشان اكسب صحتي

ولا انت ايه رايك ؟

الوسوم:

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ

إشترك معنا