إيه بيساعدك تكمل في هدفك؟

كيفية تحقيق الاهداف

ازاي اقدر اكمل واستمر .. هنتكلم عن كيفية تحقيق الاهداف ، اتكلمنا قبل كده عن تقسيم الاهداف اقرا من هنا اكتر عن ←  الاهداف

أوقات بتكون فيه حاجات بنحبها وعايزين نكمل فيها وحطيناها كأهداف قدامنا . لكن بعد شوية نحس بالإحباط ونوقف.  لو ده شعورك أو بيتكرر معاك الموضوع ده زي حالتي، تعالى مع بعض نشوف شوية حاجات من الحاجات اللي ساعدتني.  واللي أتمني انك تجربها وتساعدك وتحكي لي في كومنت عن تجربتك.

كمل ومتوقفش 

الالتزام:

يمكن أوقات نفكر .. أنا أصلا بحب الحاجات دي يبقى أكيد هحب اعملها من غير يعني ما احط التزام على نفسي. لكن حقيقي وعن تجربة عمليا ً ده مش بيحصل لأننا بنميل للراحة أكتر ودماغنا بتميل للحاجات اللي اتعودت عليها والأسهل . مش بس كده ده احنا ممكن نميل للأريح حتى لو هو مش الحاجة اللي انا بحبها  … وحتى عكسها تماما . ! اه بيحصل!

يعني مثلا عايز اكون انسان رياضي . وكلنا عارفين اهمية الرياضة وجمالها ..حلو لكن هل قدرت استمر في ده . ده انا ياما قولت اني حابب ده ومقدرتش استمر فيه لأنه ببساطة محتاج مجهود وانا محتاج التزام.

حدد حاجات تلتزم بيها تكون ممكنه للتنفيذ وبسيطة وخلي الموضوع تدريجي.

كمان بشجعك على الالتزام لأن الالتزام بيولد الشغف.

وقت الاستقلالية:

حدد لنفسك وقت خاص في اليوم كل يوم. تقعد فيه لوحدك مع نفسك ، مش للموبايل. لكن تقرر فيه انت حابب تعمل ايه وتستمتع به. وحبيت اسميه وقت الاستقلالية مش بس وقت خاص لأني عايزة اقول اننا اوقات كتير بنكون في الدراسة أو الشغل بنعمل المطلوب مننا، لكن في وقت الاستقلالية هنعمل اللي احنا هنقرر بوعي اننا نعمله ويفرحنا.

تحيط نفسك بالمشجعين:

خلي بالك من البيئة اللي حواليك . مين اللي جنبك . مين بتقضي معاهم أوقات طويلة. لو كانوا على طول سلبيين وبيكونوا معاك كتير فأكيد ده هيؤثر عليك. علشان كده افحص اللي حواليك وفكر انا مع مين ومين احب اكون معاه؟

شجع نفسك:

زي ما مهم جدا البيئة اللي حواليك يكونوا ناس مشجعين وداعمين، مهم انك انت كمان تشجع نفسك.

اتعلم تحمس وتشجع نفسك ولا تعتمد فقط على الاشياء الخارجية .

 

 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ

اشترك معنا