مشاعرك مش حرام ولا عيب

المشاعر الانسانية 

يا ترى ايه هي المشاعر الانسانية  دي .. قبل ما نتكلم فيها تعال اقولك حاجة بتحصل معانا..

أحيانا بنقول لنفسنا أو بيتقالنا على مشاعرنا عيب وميصحش!! 

حصلت معاك ؟ 

الحقيقة أنا حصلت معايا وحصلت كتير كمان  (شاركنا بكومنت اذا كان حصل معاك موقف مشابه)

زي مثلا يكون في موقف محزن وحد يقولك لا لا ميصحش تبقى حزين بالشكل ده يا راجل انت اقوي من كده !!

ايه هي المشاعر؟

المشاعر الانسانية هي ردود فعل تلقائية زيها زي الاحاسيس الجسدية.

تخيل أن حد يقولك عيب تقول انك بردان ميصحش …

موقف سخيف؟  صح ! ..

لكن للأسف ده اللي بيحصل على المشاعر الانسانية لحد ما احنا نفسنا من كتر الكلام اللي حوالينا عن كده، بنصدق انه حقيقي ، وأوقات بنصدق افكار في المجتمع زي ان المشاعر دي ضعف أو ان الراجل مايبكيش – شوف البرنامج ده ” وقفة رجاله ” وشوف الرجالة مينفعش تعمل ايه ؟!  ومتنساش تقولنا رأيك –

لكن في الحقيقة المشاعر جزء مهم من انسانيتنا و وجودنا الإنساني 

التعامل مع المشاعر الانسانية 

التعامل مع المشاعر وإدارتها جزء مهم من النضوج هي مش مجرد ثورة جوانا نتجاهلها أو نكبتها وخلاص لكن ضرورى نتعلم ازاى نتعامل معاها ونديرها.

المشاعر قريبة من الجسد وقريبة من العقل 

قريبة من الجسد : فبتشبه الأحاسيس الجسدية وما ينفعش نمنعها أو نلغيها ، كمان المشاعر لما تكون قوية او شديدة بتأثر على طول على الجسد. فمثلا لو قابلت حاجه تخوفك أو شيىء انت عندك خوف شديد منه هتلاقي ضربات قلبك سريعة وبتنهج وتعرق .

قريبة من العقل : وعشان كده هتلاقي ورا كل شعور فكرة. وده أكبر دليل ان المشاعر مش من الحدث اللي بيحصل لكن من تفسيري انا للحدث أو الموقف اللي انا فيه .. مثلا تخيل لو نفس الموقف اللي مضايقك قوي حصل مع حد تاني وارد انه ميضايقهوش او مش بالصورة اللي حصلت معاك 

اقرأ عن الأفكار في  ” ما تقوم تطمن على افكارك ” 

أولا ً الوعي بالمشاعر :

الوعي بالمشاعر هو البداية لأننا ساعتها نكون بدأنا نعرف نسمي مشاعرنا ووقتها المخ العقلاني يبدأ يفهم .. ووقتها بس ممكن نتعلم نديرها .

لكن ازاى ندير حاجة احنا مش عارفينها ولا عارفين اسمها. هنا نعرض لك مجموعة بسيطة من اسماء المشاعر حاول تخليها معاك وكل ما تسأل نفسك حاسس بإيه ؟ يكون قدامك مجموعة من اسماء المشاعر اللي تساعدك على تسمية مشاعرك .. بشجعك  تعمل كده لانه عن تجربه بيفرق جدا .. حسيت اني بتعلم لغة جديدة ودي اول خطوة في ادارة المشاعر .. اننا نعرف اسمها… 

اشجعك تاخد بالك من حاجتين:

◄ المشاعر هي بس مشاعر ! يعني  في ناس بتقسمها ايجابية وسلبية لكن الحقيقة في وجهة نظرى المشاعر مافيهاش ايجابي وسلبي هي مشاعر وبس ومحتاجه تتقبل زي ما هي ، ممكن نقول عنها ان في مشاعر مفرحة وأكيد في مشاعر مؤلمة.

◄ انت مش الشعور.. صحيح انت بتمر أو تختبر مشاعر معينة لكن ده مش معناه ابدا انك الشعور ده متقولهاش عن نفسك – لأني مؤمنة بقوة الكلام-  لكن اقول حاسس ب كذا مش انا كذا 

أسماء بعض المشاعر المؤلمة والمفرحة 

 وممكن تقرا اسماء مشاعر اكتر من عجلة المشاعر لبلوتشيك

تابعنا علشان نكمل الخطوات مع بعض ونعرف ازاي نعبر مشاعرنا 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ

إشترك معنا