ابدأ عادة جديدة

إزاي أكوّن أو أبدأ عادة جديدة؟

برديس سميرات قالت:

في قوانين واضحة قوي عشان أبدأ عادة مثلًا،

١- اجعل العادة واضحة

دة يحصل لما تعمل الخطوات اللي جاية دي:

أ. أنك تسجل العادات بتاعتك

يعني ببساطة تجيب ورقة وتقسمها جزئين، أول جزء تكتب فيه العادة اللي بتعملها يوميًا، والجزء التاني تكتب إذا كانت سلبية أو إيجابية أو عادة محايدة مش بتفيد ولا حتي بتضر

يعني مثلًا، عادة إني أصحي الصبح أشرب مياه جنبها هتكتب إيه؟ برافو إيجابية

أو عادة إني آكل بالليل متأخر أكل تقيل؟
لا دي معروفة عادي أنها سلبية بس مع أخواتنا اللي مش بيتخنوا دي بالنسبة لهم حلوة عشان تكسب وزن واسأل مجرب.

 

ب. يكون عندك نية التنفيذ

طيب دة معناه أني لما باقول حاجة اللي بيبوظها أني مش عندي النية داخليًا؟؟

لا طبعا مش معناه كده.

بس نية التنفيذ دي مرتبطة بالقانون رقم ٣ في المقال الأول (الاستجابة) مش بس إشارة وتوق

لكن أحدد وقت محدد وطريقة معينة واضحة وصريحة ومناسبة لي في التنفيذ .

 

ج. ترتيب العادة الجديدة بعد أخرى قديمة أنا أصلًا باعملها

ودي شوية مرتبطة بنية التنفيذ اللي قولناها فوق وبتكملها.

يعني لو أنتِ بالليل بتجهزي أكل الأولاد بتاع المدرسة أو الحضانة فممكن تجهزي لنفسك أكل صحي للشغل بدل ما تأكلي أكل مُضِر

أو لو مثلًا عندك عادة أنك تفتح الموبايل أول حاجة لما تصحي حط جنبها العادة الجديدة

هي أنك تكتب to do list اليوم تساعدك تنجز المهام اللي عندك بسرعة.

 

د. حاول تعيد تصميم البيئة عشان تساعدك تعمل العادة

 يعني مثلًا لو عندك دواء معين مهم تاخده قبل النوم حاول تحطه في آخر مكان بتروح عنده بالليل.

أو لو قررت تشرب مياه كتيرة فممكن تشتري زجاجة مياه شكلها مشجع ليك واملأها عشان تقعد وقت أطول وتشرب أكتر مثلًا.

 

طيب أعمل إيه لو حوليّ ناس بتعطلني أو حاجات بتعطلني؟

دة هينقلنا لتاني قانون، هو أني أخليها بتاعتي جذابة، أعمل كدة ازاي بقي؟؟

١- اني أربط العادة الجديدة بأخرى قديمة ممتعة لي

زي اني أعمل مشي في المكان أو اتمشي علي المشاية وأنا بتفرج علي مسلسل بحبه.

٢- حاول تنضم لمجموعة

مجموعة تكون بتعمل نفس الحاجة اللي أنت عايز تتعود عليها، مش بتعطلك

يعني لو قررت تمارس المشي؛ دوّر على ناس المشي معاها ممتع وبتنبسط من الحكاوي معاهم ده بيفرق، اسأل مجرب.

طيب أنا عملت كل ده وبرضه بوقف في النص!!

السبب في الموضوع ده آخر ٢ من قوانين تشكيل العادات، وهما:

٣- اجعلها سهلة

٤- اجعلها مشبعة

قانون رقم ٣ بيقولك علي مهلك مش أول ما أقرر الحماسة تأخدني وأحط لنفسي تحدي كبير يعجزني.

يعني لو قررت أشرب مياه وأنا أصلًا مش باشرب خالص أقول أنا هشرب ٣ لتر إزاي طيب! أنا كدة بعجّز نفسي.

طيب أعمل إيه؟ ببساطة أقول أنا هاشرب بكرة ٤ كوبايات وأحاول أستمر على كده علي الأقل أسبوعين قبل ما أقرر أكبّر التحدي.

وده هينقلنا للقانون الأخير إني أجعلها مشبعة.

دة يحصل إزاي؟!

أ. إني أشارك مع حد مهم عندي أو لصديقي المقرب وأقول قدامه إني مثلًا هكافئ نفسي لو إلتزمت أسبوعين إني أشتري زجاجة مياه شكلها حلو وجذاب مثلًا

ب. هو إني أعمل جدول اسمه جدول تتبع العادات

أكتب فيه، وكل يوم ألتزم أحط علامة في خانة اليوم بتاعها وبعد ٣٠ يوم تكافئ نفسك بحاجتين،

أولًا بالالتزام، والحاجة التانية إن بنسبة مش قليلة ألف مبروك بقي عندك عادة إيجابية جديدة، هتستمر معاك وتبقي بتعملها بشكل روتيني، وكمان مفيدة وحتي لو لسة فمش هيبقي فاضل كتير .. أنت قربت .. وأنت وشطارتك بقي.