وصفة السعادة

 هنتكلم هنا عن وصفة السعادة عن  السعادة من ناحية ايه اللي بيحصل في جسمنا. علشان نفهم ايه اللي مسؤول عن السعادة في الجسم.

هرمون السعادة

الهرمون المسئول عن السعادة في الجسم اسمه ” هرمون السيروتونين  Serotonin”  . ياترى ايه اللي بيزود الهرمون الطبيعي ده في جسمنا، وكمان احنا ليه عايزينه يزيد، لأن نقصه بيخليك عُرضة بنسبة اكبر للاكتئاب والحزن واليأس . وكمان علشان لما بيزيد ويُفرز في الجسم بعدها كمان بيفرز “الميلاتونين ” والتاني ده فايدته ايه ؟ . ده بقى اللي بيخليك تقدر تنام كويس بعمق ، صحتك افضل ، بشرتك افضل .

وصفة السعادة

التعرض لضوء الشمس:

بالرغم من اننا عندنا شمس كتير في بلادنا لكن الحقيقة كتير مننا عندنا نقص فيتامين د . وده لأننا مش بنتعرض كفاية للشمس. رغم ان الجسم محتاج التعرض للشمس يوميا ً وده بيزود  فيتامين D . وكل اللي محتاجة ربع ساعة يعني 15 دقيقة بس. فكّر انك تتمشى ربع ساعة في ضوء الشمس. اقرا تأثيره بالدراسات . حقيقة ان فيتامين د ليه فوايد كتير جدا لكن اللي يهمنا هنا هو انه هيزود السيروتونين.

الرياضة في الجيم:

طبعا أكيد الجيم حلو ومفيد بس انا برضوا يهمني هنا نقطة معينة وهي انك تعرق !. آه زي ما بقولك كده مارس رياضة جامده شوية تخليك تعرق وانت بتلعب.و هقولك في نهاية المقالة شوية حاجات تاني مهمه.

النوم بدري:

مش هنا علشان اتكلم عن فوايد النوم دلوقتي خالص، بس بما اننا بنتكلم عن السيروتونين فعايزة اقولك ان النوم مهم جدا علشان هرمون الميلاتونين. حاول تتعود تنام بدري حتى لو 10 مساءا أو لو مش قادر حاول على 11 .

وقت مع حد بتحبه:

صديق : علشان كده مهم نعرف بنقضي وقتنا مع مين ؟. اختار حد مريح بتحبه ومصدر ثقة وقضي معاه وقت حلو ومريح.

ربنا: اشجعك تقضي وقت هادي مع ربنا وترمي كل همومك عليه، عن خبره أوقات ده بيكون المنقذ بجد. لو مش بتعمل كده اشجعك جدا انك تجرب .. جرّب مش هتخسر. ومتنساش تكتبلي في كومنت. أما لو انت بتعمل ده أشجعك تلتزم كل يوم .

نفسك: متنساش تقعد مع نفسك وقت هادي خاص جميل رايق. حتى لو مجرد انك هتشرب مشروب بتحبه أو تسمع موسيقى أو اكتب خواطر اذا بتحب الكتابة يعني . ثق تماما ان ده مهم قوي.

وباستشارة متخصص تغذية جبتلكم اسماء بعض الأكلات اللي غنية بال ” تربتوفان” وده اللي بيكِّون السيروتونين :

الشيكولاته الدارك ، الديوك الرومي،البيض، الاسماك، المكسرات، الشوفان