النصيحة .. انصح بذكاء ؟
اسمع من مين النصيحة ؟
النصيحة ………. من اكتر المشاكل اللي بنمر بيها هي عدم الوعي أو أننا بصراحة يعني بنكسل يبقي عندنا وعي أو إن جيتوا للحق بنكسل نوعّي نفسنا يعني بنكسل نقرأ، نكسل نسمع، نكسل نحضر تدريب .
ف اول حاجة نقرر نعملها هو أننا نسأل حد عدي بنفس التجربة اللي بعدي بيها او جرب حاجة أنا بعملها دلوقتي .
وطبعا الشخص دة يبدأ يقول ايه بقي ؟
خلاصة تجربته اللي مبنيه علي ظروفه ، طبيعة تجربته المختلفة عن أي حد ، طبيعة شخصيته اللي مختلفة اكتر ، استعداده النفسي وقتها ، طبيعة استجابته ، وحاجات تاني كتيييير انتوا عارفينها .
وهنا تحصل المشكلة !!!
اسمع نصيحة حد ولا اطنشها؟
الحقيقة المشكلة اللي قولتها فوق دة هتجاوب علي السؤال ده .
اسمع نصحية الناس ويمكن تساعدني في الموضوع بتاعي ؟
ولا لأ اطنش واكبر دماغي ؟
مانتي قولتي اهو من شوية أنه مختلف عني !
الصراحة إجابة السؤال دة هتطلب منك الوعي اللي قولت عنه فوق خالص دة .
الوعي اللي بيه اقدر اعرف النصيحة دي مناسبة لحالتي ولا لأ ؟
طيب لو مناسبة هتبقي مناسبة لأنهي مدي ؟
طيب هل النصيحة دي بس كفاية اني اعدي اي مشكلة بنجاح ؟؟ ولا محتاج اشتغل وأقرأ تاني عن الموضوع دة ؟؟
طيب شخصية اللي نصحني دي شبه شخصيتي ولا هو مختلف جذريا وانا اللي أقنعت نفسي بالعافية أنه شبههي ؟
ودة هينقلنا للسؤال اللي جاي .
ازاي انصح حد ويسمع نصيحتي ؟
الحقيقة السؤال دة متقسم جزءين جزء منه عندي الدور بتاعي.
وجزء تاني عند شخص تاني .
الجزء الاول
أنا محتاج لما حد يطلب نصيحتي في موضوع اعمل التالي
١- احكي الموقف اللي عديت بيه المشابه للموقف دة بكل وضوح وبدون تجويد .
٢- احكي تصرفي أنا في الموقف دة مع العوامل المختلفة كلها اللي مريت بيها .
٣- احكي ايه اللي ساعدني اتصرف في الموقف دة كدة.
٤- احكي التحديات اللي عديت بيها كمان ( ماهو اكيد الدنيا مش وردي يعني ) .
٥ – طول الوقت وانا بحكي أأكد أن دي تجربتي الشخصية أنا عملت كذا عشان حصل كذا
أنا قريت كذا لقيته مناسب لطبيعتي ( بلاش تعمم التجربة ) .
الجزء التاني
هو الشخص التاني
لازم عشان تنصح بذكاء ماتنصحش اصلا !!
ازاي بقي مانصحش ؟! يعني بعد الكلام دة كله والقراءة دي كلها مانصحش ؟!
ايوة بالظبط ماتنصحش حد وانت مش عارف هو واقف فين من المشكلة.
اقولك دة حتي لو عارف هو واقف فين ماتنصحش لو انت مش مكانة كليا بنفس الوضع النفسي والمشاعر والتحديات
أمال اعمل ايه ؟
١- تقدر تساعد الشخص أنه يعبر عن كل اللي حاسس بيه .
٢- تسمع بدون مقاطعة . اقرا المقالة دي هتساعدك .
٣- تفكر مع الشخص أنه يلاقي حلول هو اللي يطلعها من الحكاوي بتاعتكم مش انت اللي تفرضها عليه .
٤-تدعم بانك تتواجد وتطمن انك متاح تساعد وقت ما الحاجة
بعد ما تعمل الكلام اللي فوق ده
هتساعده في اللي تحت ده 👇
١-هينجح أنه يعدي المشكلة دي .
٢- هينجح أنه يكتشف نفسه من خلال تجربته.
٣- هينجح أنه يتعلم طريقة جديدة لكل مرة يقع في تحدي جديد .
وكدة تبقي انت نجحت اكتر من انك تنصح وبس !
اترك تعليقاً