مبقدرش أخبي عليه حاجة

احكي مع مين ؟ يا ترى مين في حياتك تقدر تقول عنه الجملة دي ؟ “مقدرش اخبى عليه حاجة”

أوقات بنمر بصراع بين أننا نفسنا نحكي ونفضفض ونطلع اللي جوانا وبين المخاطرة اللي هناخدها لما نحكي أسرارنا. و أحياناً بنكون انصدمنا من ناس مكنوش أمناء فقررنا نقفل خالص ، أو نكون فعلا مش لاقيين حد يسمع بجد.

هنتكلم هنا عن .. اختار مين احكي معاه و ازاي احكي وكمان ايه حدود الخصوصية ؟

حدود الخصوصية: 

أولاً أحب أكد ان الخصوصية والمحبة مش متعارضين أبداً أبداً ، بمعنى اني  انا بحب الشخص ده وفي نفس الوقت انا محتاج اعرف هو فى انهى دائرة في العلاقات بتاعتي وأقدر احكي له ولا لأ. والموضوع ده  بيتوقف على حاجة من أساسيات التعامل وهي : الثقة.
والثقة مش بتتبني في يوم كده  كأني بمجرد ما شفته ارتحت له وعلى طول  حكت له كل اللي جوايا وبعد ما ده يحصل ارجع أندم وأقول مكنش محل ثقة ، لأن في الحقيقة الثقة بتاخد وقت لأن ده بيبان من الخبرة والعشرة والمواقف اللي بنعديها سوا.

احكي ازاي ؟

ثانياً ، الحقيقة لما فكرت في الحاجات اللي بنندم اننا حكيناها، غالبا هي مواقف أو أحداث . وعلشان كده بقولك ما تحكيش أحداث !! هتقولي ازاي بقى ما هي دي اللي مضايقاني  وعلشان كده أشجعك انك تستغل الفرصة دي واتعلم تعبر عن اللي مضايقك بطريقة صحيحة ! لأن الحقيقة اللي مضايقك مش الحدث ! ماتستغربش صبرك عليَ ….. مش يمكن نفس الحدث يحصل لاتنين جنب بعض وكل واحد فيهم يكون جواه شعور مختلف .. فكر فيها 

وبكده يبقى الفكرة في تفسيرك انت للحدث مش الحدث نفسه ، علشان كده حاول تفهم ايه اللى مضايقك وتعبر عن مشاعرك بكلمات مثلاً  يعني تقول أشعر ( بالحزن – الغضب – الفرح- الامتنان – الاستياء – الضيق .. وهكذا 

أشجعك تقرا وتعرف عن المشاعر وادارتها وممكن كمان تسمع الفيديو اللطيف ده عن المشاعر من د. أوسم وصفي

احكي - المشاعر

نيجي بقى للمهم 

احكي مع مين ؟

 الحقيقة في نصيحة غالية قوي وهي من عالم نفسي  بيقول انك ممكن تبدأ تشارك جزء بسيط من مشاعرك مع بعض الأشخاص المختارين وتلاحظ ردود أفعالهم ، جرّب لأننا الحقيقة كلنا محتاجين نحكي مع حد آمن وخصوصاً وقت الضغوط 

و في النهاية هنا هقولكم علامات أو صفات مهمة جداً في الأشخاص الآمنين اللي تطمن تحكي ليهم وهلخصلك الصفات دي انهم :

  • بيسمعوا باهتمام ( إصغاء جيد) أو بمعنى آخر بيسمعوا بقلبهم 
  •  مش بينصحوك  أو يتعبوك بأنهم يملوا عليك تعمل إيه وماتعملش إيه
  • يعرفوا يتواجدوا معاك  أو عارفين معنى المواجدة
  • ينظروا في عينيك ويهتموا  وقت ما انت بتتكلم
  •   لا يتعجلوا إيجاد الحلول ، يعني مش  بياخدوا كلامك انك بتحكي علشان حل مباشر
  • مش بياخدوا دور القاضي 
  • مش بيغالوا عليك أن تعبهم أكتر 
  • بيحتفظوا بالأسرار والسر مش ممكن يطلع منهم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ

إشترك معنا