بتتمنى إيه؟

تحقيق الاهداف

يا ترى لو سألتك بتتمني إيه ؟ هتكون إيه إجابتك ؟ ويا ترى هل انت بتحقق أمنياتك؟ الحقيقة اننا كتير بنتمنى حاجات لكن مش بنركز اننا نحققها ولا لأ .. كأنه صعب يحصل يعني !!

تحويل الأمنية لهدف علشان تحققه :

الأمنية: هي شيء أو رغبة جواك نفسك تحققها وممكن تكون ظهرت جواك نتيجة ظروف أو حاجات خارجية حصلت.

ملهاش تجسيد على أرض الواقع وأكيد ده معناه ان مش عندك طريقة أو خطة علشان تنفذها . 

الهدف :هو تجسيد الأمنية دي على أرض الواقع وتحديد خطة أو طريقة لتنفيذه في الحياة . بيقولنا” أنتوني روبنز”: إنّ تحديد الأهداف هو الخطوة الأولى لتحويل غير المرئي إلى مرئي، وهذا هو سر كل نجاح في الحياة.

 

تحديد الاهداف أهم وأول خطوة :

علشان كده الخطوة الأولى والمهمة جدا علشان تحقيق الاهداف هي انك تحدد أهدافك و انواع الاهداف دي ، ياترى هدفك ايه وفي انهي مجال في الشغل ولا الحياة ولا ايه .. هنقدم لك هنا تقسيم لكل مجالات الحياة وهنعمل سوا لوحة للأهداف وكمان تقدر تحملها وتطبعها وتخليها دايما قدامك خلال الوقت اللي انت محدده للأهداف دي وليكن سنه مثلا .

افتكر” أن من يملكون الأهداف ينجحون، فقط لأنهم يعرفون إلى أين يذهبون ” إيرل نايتنجيل

يالا نعمل سوا:

لوحة الاهداف عبارة عن لوحة أو ورقة كبيرة تعلقها قدامك أو حتي ممكن تستخدم ابليكشن موبايل عن  vision board أنا بحب استخدم برنامج canva سهل جدا وشكله لطيف وموجود منه ابليكشن موبايل ادخل وابحث عن Vision Board templates   واعمل الشكل اللي تحبه وبعد كده احتفظ به او لو تحب اطبعه ، واذا تحب انها تكون  ورقية ومتعلقة قدامك في مكان تقدر تشوفها باستمرار نفذها على لوحة او ورقة .  يالا نبدأ نعملها سوا .. ناس كتير بتعمل لوحة الاهداف وبيكون أغلبها اهداف في نفس المجال من الحياة،  لكن هيكون حلو وهيساعدك قوي انك تقسمها.
اطبعها من الصورة في نهاية المقال 

   تقسيم الاهداف في 5 نواحي  : 

وده بالظبط اللي هنعمله في اللوحة هنكتب في النص لوحة الأهداف ، ونقسمها الى 5 اجزاء وهي : (الشخصي ، الصحة ، الوظيفة ، العمل ، المال ) وهيساعدك كتير أنك تختار وتكتب الأهداف بطريقة محددة جدا ( اقرأ من هنا طريقة تحديد الاهداف SMART

وكمان ممكن تكتب هدف أو أكثر زي ما تُحب في  كل مجال 

  • الشخصي : عايز تهتم بشخصيتك ازاي ( ممكن تقرا المقالة دي الضغوط هتموتني )
  • الصحي: كثير بسمع ناس بيقولوا انا عايز ابقى صحي ، حاول تكون محدد، يعني ايه صحي .. هل هي بالنسبة لك بتلعب رياضة معينة بشكل منتظم ايه هي الرياضة ؟كام يوم في الاسبوع ؟، ولا عايز تنزل جيم ولا تمارس رياضة في البيت ولا تلتزم ببرنامج معين ؟
  • العمل “Career” : انك تكبر شغلك أو حتى تعمل الشغل الحالي بأفضل طريقة ممكنة.
  • الوظيفي: بيختلف الوظيفي عن العمل ، في العمل انت بتكبر شغلك بطريقة أفقية، في الوظيفي أنت بتكبر بطريقة رأسية يعني تترقى في شغلك مثلا.
  • المالي : اذا كنت مثلا هدفك تشتري عربية معينة، متكتبش بس الفكرة لكن حدد ايه هي العربية ونوعها وهكذا، خليك محدد جدا.

 

ملاحظات هامة : 

  • يتم تحفيز الدماغ أكتر، لما تكون المعلومات في صورة أرقام أو صور . علشان كده أنصحك أنك تدور على صور على الإنترنت توضح اللي انت كتبته في الأهداف والصقها ( مكان تحب السفر إليه- نوع الرياضة التي ستمارسها، وهكذا.. وكمان انك  تكتب ارقام :(مثلا  اكتب عايز ادخر مبلغ قيمته 2000 جنيه بدلا من كلمة ادخر كثيراً ) 
  • راجع أهدافك باستمرار وخليك واقعي.
  • احرص على قياس النتائج أسبوعيا وشهريا .
  • اكتب على اللوحة بعض الأقوال المحببة إلى قلبك والمُشجعة لك.

لوحة الاهداف تقدر تحملها من هنا و تكتب عليها وتطبعها كمان إذا تحب

تحقيق الاهداف

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ

إشترك معنا