السؤال المعتاد: عامل ايه ؟؟

عامل ايه


السؤال المعتاد اللي كلنا بنقوله أو بنسمعه كتير في اليوم الواحد. لكن الحقيقة السؤال ده رغم انه متكرر لكن قليل جدا لما بنجاوب عليه حقيقي مش بس قدام الناس لكن كمان قدام نفسنا، مش بس كده لكن كمان أوقات كتير بنحاول نبين حاجة غير الحقيقة اللي جوانا.

يا ترى ليه مش على طبيعتك ؟ 

 في مرة بحكى مع أحد الشباب قال انه مبيقدرش يظهر ضيقه أوتعبه خالص حتى قدام أقرب الناس لأن الرجوله مش كده والراجل يتحمل وأي حاجة غير كده تبقى ضعف ! معروف يعني ان الراجل ميعيطش 

ومع إحدى البنات قالتلي هيقولوا عليَ نكدية وكل ما شوية اتضايق بسهولة خلاص بلاش احسن كلام خالص !

عامل ايه

يمكن في أسباب كتير لأننا منظهرش طبيعتنا زي مثلا :

  • المجتمع والناس هيحكموا عليّ  (اقرا مقالة هيقولوا علي ايه؟  )
  • لازم أكون بصورة معينة علشان أتقبل 
  • أنا كمان عندي فكرة جوايا أن المشاعر دي ضعف 
  • خايف أقول ما اتفهمش وكلامي ما يتقدرش ( اقرا مقالة مقدرش اخبي عليه حاجة )
  • اني أكون أنا نفسي مش عارف مالي فعلا !!!

في مقولة جميلة بتقول :

يَسهُل خداع الناس، لكن الأكثر صعوبة وألمًا… خداعك لنفسك”

مؤلم جدا انك تكون بتخدع نفسك أو أصلا من كتر كبت المشاعر ورفضها مبقتش عارف ايه هي؟ ! ولا قادر تميزها علشان تتعامل معاها 

النهاردة  عايزة أقولك على فكرة فرقت معايا كتير جدا 

الحقيقة اكتشفت بعد رفض مشاعري وقت طويل، أن الحقيقة مافيش مشاعر حلوة ومشاعر وحشة ، الحياة فيها كل أنواع المشاعر وكل المشاعر مهمة للحياة ولتطورك وكبرانك مافيش مشاعر سلبية ومشاعر إيجابية 

يمكن تكون مثلا في مشاعر مؤلمة ومشاعر مفرحة لكن الاتنين مهمين جدا في الحياة 

في كتاب بعنوان كن قويا مقولة جميلة بتقول “ أشعر بالامتنان لكل من الحب والحزن اللذين مررت بهما في حياتي، فقد كان تأثير كل منهما على حياتي رائع بشكل متساو.”

اعمل ايه؟

  • فكر واعرف انك انت مش الشعور 
  • اقبل أي شعور تمر بيه
  • اسمح للمشاعر أنها  تمر 

تدريب :

اسأل نفسك خلال اليوم : عامل ايه ؟ حاسس بإيه؟

جاوب ب 3 مشاعر
اشجعك في البداية تكتب على ورقة ان أمكن هيساعدك اكتر

(الفكرة انك تحاول تكتب 3 مشاعر إننا غالبا بنعرف اول شعور لانه بيكون قوي لكن احرص انك تعرف 3 مشاعر لأن ده بيساعدك تعرف الشعور الأعمق اللي مش ظاهر على السطح)

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ

إشترك معنا